Historie van 't Kefee ane Kèrk in Dialect

Veur dit hoes is op 19 juni 1913 de ieërste drank en horecavergunning aafgegaeve. Faasj vanne Nies waas de ieërste oetbater, hae woondje hiej mit Betje. Dees Betje is neet zien vrouw, mer waarsjienlik ein óngetrouwdj zöster of nich. Ut hoesadres waas toen ‘Aan de Kerk’ 126. Ut nummer verangerdje in 1921 in 142 en nag later in 151. Pas op 7 november 1940 verangerdje ‘t in ‘Achter de Kerk 2’. En in 1967 weer in ‘Aan de Kerk 2’.

Es se oet de kèrk kooms, de trappe aaf, leep se rechdoor vanzelf die Kefee in en det deej dan auch mennigein nao de hoeames en auch ès gein mes waas. Faasj haw ein aope bein, en es det ‘m weer ens flink stook, lag der det ómhoeag en zoea zooge de luuj ‘m waal ens mit det bein op ein kússe in ne raam zitte. Zien húundje Rita zoot altied bie ‘m en lekdje zien wónje sjoean.

In 1949 is Faasj gestorve en erfdje Fäös vanne Nies dees Kefee, want dae waas inne oorlog al zien femielie verlaore en dit waas nach ziene einige lèvendje omae. Mer Fäös wool die Kefee neet, zien vrouw Jet van Sjieëpers haw al de Kefee van Truuke van Sjieëpers oppe naam stjaon en ein Kefee waas auch zat. Dus verkoch Fäös de Kefee aan Hannes Maasse, dae dao ging wone mit zien vrouw Betje en heur kientjes Alda en Jan. Alda (getrouwdj mit Herman van Sjieëpers) haet nach de offisjieel kaup-ak! Wie Hannes in november 1954 plotseling daod ging, bleef Betje allein zitte mit 4 kinjer en zie heel de Kefee aan. Inne volksmondj waas ‘t toen Bie Betje. Later haet Jan (de aatste zoon van Betje en Hannes) de Kefee euvergenómme toet januari 2009. Pjaer vanne Ruit mit zien vrouw Mia van Teun van Driekus höbbe noe sáme dees Kefee euvergenômme en höbbe de naam verangertj in “ ‘t Kefee ane Kèrk ”.